Qırmızı soğan təkcə mətbəxdə dadverici məhsul deyil, həm də sağlamlıq üçün faydalı xüsusiyyətləri ilə seçilir. Mütəxəssislərin sözlərinə görə, bu tərəvəz immun sistemini gücləndirməyə və orqanizmi bir sıra xəstəliklərdən qorumağa kömək edir.
Qırmızı soğanın tərkibində yüksək miqdarda antioksidantlar, xüsusilə kversetin maddəsi var. Bu komponent orqanizmdə iltihabın azalmasına, ürək-damar sisteminin qorunmasına və qan dövranının yaxşılaşmasına müsbət təsir göstərir. Bundan başqa, liflə zəngin olduğu üçün həzm sisteminin fəaliyyətini yaxşılaşdırır və bağırsaq problemlərinin qarşısını alır.
Araşdırmalara görə, qırmızı soğan qan şəkərinin sabitləşməsinə də müsbət təsir edir. Bu səbəbdən diabet riski olan şəxslərə ölçülü şəkildə qida rasionuna əlavə etmək tövsiyə olunur. Həkimlər qırmızı soğanın çiy halda istifadəsinin daha faydalı olduğunu qeyd etsələr də, mədə problemi olan şəxslərə ehtiyatlı davranmağı məsləhət görürlər.
