Azərbaycan Alüminium Açıq Səhmdar Cəmiyyəti (ASC) ləğv ediləcək.
Bu barədə Azərbaycan Respublikasının Prezidenti İlham Əliyevin bu gün imzaladığı "Azərbaycanda Dağ Mədən və Metallurgiya Sənayesinin İnkişafının Təmin Edilməsi ilə bağlı bir sıra tədbirlər haqqında" sərəncamında bildirilib.
Sərəncama əsasən, Maliyyə Nazirliyinə Azərbaycan Alüminiumunun qeyri-dövlət təşkilatları qarşısına təsdiq edilmiş borclarının qaytarılması üçün Azərbaycan Dövlət Büdcəsinin vəsaiti və ya qanunda nəzərdə tutulan digər maliyyə mənbələri hesabına, müvafiq təsdiqedici sənədlər təqdim edildiyi tarixdən bir ay müddətinə təmin edilməsi tapşırılıb.
Azərbaycan İnvestisiya Holdinqinə isə bu sərəncamdan irəli gələn məsələlərin həlli üçün zəruri tədbirlər görməsi tapşırılıb.
Qeyd olunur ki, Azərbaycan Alüminiumunun aktivləri "Azəralüminium" Məhdud Məsuliyyətli Cəmiyyətinin balansına veriləcək.
