Groningen Universiteti Tibb Mərkəzinin alimləri stress və digər psixososiol amillərin xərçəng riskini artırmadığını aşkarlayıblar. Tədqiqatın nəticələri "Cancer" jurnalında dərc edilib.
Bildirilib ki, tədqiqatda psixoloji və sosial amillərin xərçənglə əlaqəli olub-olmadığını araşdıran beynəlxalq konsorsiumun məlumatlarından istifadə edilib. Alimlər müxtəlif psixososiol göstəricilər üzrə qiymətləndirilən 421,799 nəfərin məlumatlarını təhlil ediblər. Bunlara sosial dəstək səviyyələri, ailə vəziyyəti, kədər, narahatlıq meylləri və ümumi psixoloji stress daxil edilib.
Təhlillər göstərib ki, bu amillərin heç biri ümumilikdə xərçəng riskinin artması ilə əlaqəli deyil. Sinə, prostat və kolorektal xərçəng də daxil olmaqla, ən çox yayılmış xərçəng növləri ilə də heç bir əlaqə tapılmayıb.
Bəzi statistik əlaqələr əvvəlcə ağciyər xərçəngi xəstələrində, yaxınlarını itirmiş və ya sosial dəstəyin aşağı səviyyədə olduğu insanlarda müşahidə edilib. Lakin məlum risk faktorları, əsasən siqaret çəkmək və ailə tarixçəsi nəzərə alındıqdan sonra bu əlaqələrin əksəriyyəti özünü doğrultmayıb.
